Quand j'song à l'destinaie
D'on misèrab' houyeû
Qu'ouveur' tot' li journaie
Po châffer les Monsieurs ;
S'i fât qu' wâgne in' moûnaie
I pins' cint feïes pèri ;
I vint à l'fin d'l'annaie
Ossi pauv' qui todi.
         2.
L'an dihe hût cont et doze,
Li vingt hût' dè p'tit meû,
On d'hind bonn' mint ès l'fosse,
Todi bin corègeux.
Quoiqu' tot hàzârdant s'veïe,
On n'kinoh' nin l'dangî ;
In z-ouveure à l'èveïe
Sins jamâïe songî.
         3.
Nos n'nos attindîs wère
A çou qu'esst arrivé,
Quand nos ètindans braire
Qu'i n'y a pus qu'à s'sâver.
Divin n' pareye hisdeûre
Nos corans â hàzârd;
Qwand n's arrivans â beûre,
Il est dèjà trop târd.
          4.
Goffin n'jambe ès l'coufâte
Est tot prèt à r'monter :
I song' qu'i fret in' fâte
S'i vint à nos qwitter :
I sôrte et d'on ton grâve
S'adressant à turtos,
I dit qu'fât qu'i nos sâve
Ou qu'perihe avou nos.
          5.
C'est lu qui plein d'corège
Ossi bin qu't'ètind' mint
Fait trawer l'beùr' d'airège,
C'est l'affair' d'on moumint.
C'est por là qu'on s'èchappe,
Qu'on z-évit' dè pèri ;
Mais d'vant d'ess' foû dè l'trappe
N'y a co bin à soffri.
          6.
Les vîs tot comm' les jônes
Qwand on z-est rassônné,
Houbert Goffin, qu'nos mône,
Dit po nos refrener :
" Colson noss' camarâde
" Nos abandonn'reut-i ?
" Seyîs sùrs qu'i n'a wâde;
" C'est lu qu'nos fret sòrti. "
          7.
" Ovrans donc sins rattinde ;
" Habeye ! vite attaquans ;
" I fât qu'on nos ètinde,
" Qu'on sèp' qui nos vikans.
" Qwand  sàret in feïe
" Ouis' qui nos nos trovans,
" Les autes â pus habeye
" Ouverront enn' avant."
          8.
On l'hoûte, on s'apnteïe
N'y a nouk qui n'vôye ovrer.
On prind chaque ine usteye,
On qwîre à s'disterrer.
On vint à fer n'trawaie,
On est tot mervyeux ;
On n'a fait qu'in' corwaie,
On trouv' li feû grieûx.
          9.
I s'fait on grand tapage
Qu'on dobel' par on cri ;
On jett' la hache et mache,
On pinse aller pèri.
Goffin, qui n'pièd' nin l'tièsse
Coûrt vit' sitoper l'trô ;
I falléf si hardièsse
Personn' n'eûh' paré l'côp.
          10.
I fât qu'on moûre ès beûre
Si c'est qu'on n'ouveûr' nin ;
Et si c'est qu'on z-ouveûre
On craint co n'accidint.
On pleûre, on désèspère,
Et paou dè manquer
On dîreût qu'on préfère
Dè mori qu'dè viker.
           11.
N'y a pus nolle espèrance ;
On s'résout à pèri.
On veût l'moirt qui s'avae
Prète à nos v'ni qwèri.
Les vîs turtos essône
Fet n'act' di contrition,
Et so c'timps là les jônes
D'mandet l'bènèdiction.
           12.
Onk met' si confiince
Es l'bennïe vièrg' di Hâ,
Promet' po si assistince
On voyège à pîs d'hâs.
In aut', divin s'misére,
S'adresse à Saint Lînâ.
Mathî (1) dit : " Hoûtez m'père !
Taihîs-v', vos n'polez mâ. "
           13.
" Si n's avans dè corége, "
Nos dit li p'tit Mathî,
" Qu'on sèp' par noste ovrège
" Tot çou qu'nos mèritîs.
" Si nos estans esclâves,
" Si nos d'vans mori d'faim,
" Qu'on n'ritrouv' nos cadâves
" Qu'avou l'usteye ès l'main. "
           14.
Ces raisons là sont bonnes,
I fât bin l'avouer ;
Mâgré çoula personne
No ois' pus s'rimouer :
Goffin tot d'on côp s'dresse
Et nâhi d'nos veyî
Happ' si fi d'vin ses bresses
Et vout s'aller neyî.
           15.
On l'ritind, on l'assûre
Qu'on fret çou qu'i vôret ;
Qui n's estans prèt à l'sûre
Tot ouis' qu'i nos monret.
Vint ine aute avinteûre,
Deux chandell' distindet
Et l'treusinm' qui nos d'meûre
Distind d'abôrd après.
           16.
Personn' n'a pus èveïe
Dè rik'mincî d'ovrer ;
On s'plaint, on r'nonce à l'veïe,
On n'fait pus qu'dè plorer.
Mathî n'jett' nin n'seûl' lâme
Et nos apostrophant,
Dit : " vos n'avez nolle âme,
" Vos fez comm' des èfants.
           17.
Ci valet là qu'affronte
Tote espéc' di dangî,
I fât l'dîre à noss' honte,
Sé nos rècorègî :
n rassônn' tot' ses foices
Pon' nin s'leyî brokter.
Goffin inteûre ès l'roisse
Et nos fait tos monter.
            18.
Qwand on z-esst à l'copette,
On pins' qu'on z-ôt on brut.
Ci brut là, qui s'rèpette,
Fait qu'on z-est tot foû d'lu.
I n'y a nouk qui n'ètinde
Haver, côper, hotter ;
I n'fât pus wèr' rattinde.
On va ressusciter.
            19.
On trawe, on nos fait vôïe,
On creïe : i sont sâvés !!
Po bin jugî d'noss' jôïe,
I faléf s'y trover.
On s'wain' divin l'aut' beûre
Les cis qu'nos ont d'lîvrés,
Fait à fait' qu'on z-inteûre,
Nos r'cevet comm' des frés.
            20.
A fait d'jôïe, c'esst apreume
Qwand c'est qu'on z-est r'monté ;
Nos èfants et nos feummes
Accoret d'tot coestés.
I n'y a sôrt' di caresse
Qu'i n' qwèresse à nos fer.
I nos t'net d'vin leûs bresses
A n'poleûr' s'ennès d'fer.
            21.
En attindant on k'mince
A r'ovrer pi viker ;
N'y a comme in' providince
Qui n'nos lait rin manquer
On n'fait rin à moiteïe,
On nos l'a bin prové ;
On nos a sâvé l'veïe,
On vout nos l'conserver.
            22.
On crût d'veûr si surprinde
D'in' pareye charité ;
On n'pout d'abord comprinde
Tant d'gènèrosité.
N'y a portant rin d'si simpe
On n's'enn' èmerveye pus ;
Li préfet (2) donn' l'eximpe,
Tot l'mond' vout fer comm' lu.


(1) Mathieu, fils de Hubert Goffin.
(2) M. le baron de Micoud, chevalier de la légion d'honneur.


Choix de chansons et poésies wallonnes, p.116 (1844)
source : archive.org